Нырысетӥ лымы

Туннэ, 25тӥ шуркынмонэ, Будапештын усиз нырысетӥ лымы! Со туж бадӟым шуд :) Мылкыд ӝутскиз, тӧлыз зол ке но пельтӥз. Зато мон нырысьсэ понӥ выль басьтэм беретме. Тол дӥсь комплектэ быдэсак дась табере, кылиз на лымылы уногес музъем вылэ усьыны.
Дыр но ӝоген вуоз Россие бертыны. Шӧдӥське ни, уйвӧтам туннэ семьяме адӟи угось. Эшшо мон туннэ учки "The Words" фильм. Со одӥг гожъяськись сярысь, кудӥз пӧяса поттӥз романзэ. Но со роман гожтэмын вал мукет адямиен. Но мон та киноез учки, отын Бен Барнс шудэ шуыса. Солы мон пичи синмаськи "Портрет Дориана Грея" фильмез учкыса. Но та ини мукет верос...

Pro Mentalitet

Куддыръя чиданлык уг тырмы Удмуртиысь пияшъёслэн "ӟуч" менталитетзылы - мукет термин уг шедьтӥськы. Нылашэн кусыпъёс лэсьтыку, кылсярысь. Пияшлы верало: "Тынад нылашед пӧяз тонэ, со мукет сямен лэсьтӥз, кариз сое, мар сярысь кыл но ӧз потта". Но пияш одно ик оске - та возьматэ, пияшлэн сямыз ляб шуыса, огшоры вераса, со - слабак. Пияш яратэ ке нылашсэ, со кулэ одно ик оскыны солы, нош мултэс вераськонъёсты лыдэ басьтыны чик но кулэ ӧвӧл.

Кыкетӥ малпанэ: пияш туж ӝог "кисьма". Кутске вераны ненег, конял кылъёс, кызьы со яратэ нылашсэ, всё бесповоротно! Яратон, зэмзэ вераса, шуак уг вордӥськы. Солы кулэ дыр. Трос адямиос дунне вылын сурало яратонэз кельшон шӧдонэн(яке влюблённостен). Кыкетӥез мылкыдэзъя капчигес, лякытгес. Со калленэн ортче. Нош зэмос яратон кужмо луэ, со - даурлы. Соин ик, яратоно лыдӟисе, ӧн дырты лэсьтыны шаплы йылпумъянъёс, рос-прос малпаськы, сюлэмдэ сак кылзы.

Куинетӥ малпанэ: налаш пияшлы эш луыны быгатэ. Малы уг яра. Соосыз герӟало одӥг кадь тунсыкъяськонъёс, соос ог-огзылэсь сэлэмшугъяськонъёссэс тодо, соос ортчыто ӵош дырзэс, верасько, серекъяло - со уг сыӵе мусо но огшоры. Эшъяськон - со одӥг самой дуно маке. Эшъёс уг котьку но юрттозы, кенеш сётозы, шуныт кылэн вешалозы. Кышкытэз ӧвӧл, эшъяськон пияш но нылаш куспын улэ ке. Мыным потэ, со - нормальной явление.

P.S. "Ӟуч" менталитетэз пияшъёслы одно ик турттоно воштыны. Соку, оло, семьяоссы но шудогес , юнгес луозы.

Та пияшлэн пушдуннеез, менталитетэз явно выли дунлыкъёс вылэ пыкиське!

...Мон вань сюлэменым яратӥ та Будапештэз! Татын гань-гань улон мынэ. Та Европа. Уг, али но уг оскиськы ай. Куинети толэзь мынэ ини. Мон тодӥсько kicsit венгер кылэз. Мыным кельше сое дышетыны. Малы уд дышеты?? Со уг нош ик вылӥ тубат вылэ выжон. Адями со понна кылдэмын - азинскыны. Сыӵе данъяськон тулкым тонэ басьтэ, куке валаськод пичи ке но, мар сярысь зулё дортӥд ортчись адямиос, пальпотӥськод...Венгер кылэз ми дышетӥськом "йӧскалык" группаын. Малы озьы шуисько - дуннелэн пӧртэм палъёсысьтыз вуэмын студентъёс со группаямы (Словения, Бразилия, Латвия, Испания, Канада, Мексика). Милемыз огинэ люказ венгер кыл. "Тау" солы.
Адямиос та кунын лякыт сямоесь, как ни крути. Шӧдӥське бадӟым пӧртэмлык ӟуч калыклэсь. Венгеръёс извиняться каро номыр уродзэ лэсьтытэк но мукетэзлы. Куке Ижкарын яке Омскын сыӵе учыр дыръя "вождэз ӧн вае" но уз вералэ=( Венгер адямиос уг кильтыръясько: банкын ужась тон яке выж миськись. "Тау" вераны зарнизы уз кисьтӥськы ымысьтызы, сю пол но вералозы, главное сюлмысь мед потоз со таукарон.
Будапешт - со зэм но ЗЫН кар. Улон интытэк адямиос( бомжъёс) оглом вераса трос. Автобусэн но соос быгатозы ворттылыны. Благо, кондукторъёс татын ӧвӧл, лек синъёсын уз учке тон шоры но уз куре коньдондэ. Бомжъёс изё урамын, вузкаронниос вӧзын ик, переходъёсын, метро палан- отын ялан шуныт. Соин ик паймоно ӧвӧл, асфальт вылысь котырес вупукылъёсыз адӟид ке.=)
Татын калык бызьылыны яратэ, велосипедэн ветлэ. Социальной статус валтӥсь чик но ӧвӧл. Кылсярысь, офисын ужась воргорон ветлэ велосипедэн, огшоры, капчи мылкыдын. Солы по-барабану мар малпалозы азяз сюрись адямиос. Солы аслыз умой но всё. Но сыӵе ваньлыклэсь котырысьтыз арбериос, адямиос озьы ик тырмо шудэн, шумпотонэн. Капчи татын.
Куазез татын но шузи. Туннэ - шунды , ӵуказе - зор. Пурысь бус вӧлске Дунай вылэ.Но со суред пыӵатэ тонэ мистической, вашкала, готической шӧмен. Котькуд адямилэн со шӧдонэз аслаз. Али шуркынмонэ зэмзэ но куазь пурысь ке пурысь ини. Смоген бырем Лондонын кадь астэ шӧдод, тамак зыно Прагаын но. Нош венгеръёс куазез валасьтэм муртъёс кадь выро, асьсэлэн дуннеязы, а мар-а уло. Тани пияш ортчиз шортикен но футболкаен, тани кышномурт мынэ леопард шубкаен но тол сапеген=) Уд вала соосты.Нош соос уг валало,дыр, кыӵе амалэн дӥсяськоно. Видимо, Россие ӧз вуылэ на.
Будапешт сярысь веран пумтэм-йылтэм кыстӥськыны быгатоз. Туннэлы тырмоз=).

1 шуркынмон. Вот и кутскиз нуналмы Прагаын.Ӵукна вазь ик султӥм, комнатаямы пӧсь - толалтэ дыръя кадь эсто. Ну сое луэ валэктыны, куазез но кезьытгес шуыса, Будапещтэн ӵошатыны ке. Мон ӧй витьы вал хостелмы "сыӵе" луоз шуыса: общежитие выллем, тамак зын коридорын, малы ке шуоно кухняын ик кыско, отын ик сяськаос сыло, жаль потӥзы соос мыным. Ярам, комендант умой кышномурт вылэм: валэктӥз, кызьы центрозь мыныны.
Озьыен, вуимы центре. Татын обычно кутско экскурсиос. Калыкез уно, ваньзы туристъёс.Одӥг нунал куспын 5000 котыр люкасько,дыр, соос. Милям вал индивидуальной экскурсия ӟуч гидэн, со пыр-поч валэктӥз вань синпелетъёсты, интыосты, кудъёсыз сюризы пумитамы.
Ваньзэ соосты вераны дыр уз тырмы, малпасько. Соос Прагаын туж-туж трос, но кудӥз-огез сярысь верало.
Татын вань Йӧскалык Музей(туж вашкала), но жаляса верано, пыраны ӧм быгатэ - 2016 арозь со ремонтын. Площадьёс пӧртэм дано адямиослэн нимынызы, озьы ик урамъёс. Коркаос нимысьтыз пусъёсын, кылсярысь, сапег суредамын - со возьматэ, та коркан сапег лэсьтӥсь мурт улэ вал шуыса. Сюрес урамъёсын брусчаткалэсь, со озьы ик улэ, асфальт вылаз уг кисьто. Пражский Град - азьло улэм корольёслэн замокъёссы, библиотека, крепостьёс. Туж но туж кельшиз Святой Витлэн Соборез! Со ӝужыт, готической стилен лэсьтэмын, вашкалаез адӟиське сьӧд буёллэсь, кудӥз ке тузон кадь кылле. Но со материалэз дыр куспын чырсам кадь луэм. Готика сяна, синпелетъёс лэсьтэмын барокко, рококо стилен. Паймоно, соос ог-огенызы уг керето шуыса. Малы ке шуоно, одӥг интыын ваньзэ "уло". Кыкетӥ денне ожын Прагаез ӧз "исалэ", со понна но вуж зданиос али но сыло, вашкала историез пушказы утьыса. Эшшо самой вашкалаез со Карллэн выжез (Карлов мост). Сое пуктыны кутскем ачиз Карл король 15 даурын.
Та выж вылын ог 30 синпелетъёс сыло. Куинь вамыш лэсьтӥскод, бур но паллян палан синпелет шӧде=) Азьлань выж палась мынӥськод нош ик выль башня сылэ...
Прагалэсь чеберлыксэ "юыны" йылтэм-пумтэм быгатоз котькуд турист. Котьку но выль сямен тон усьтод солэсь пушдуннезэ - со уте туж узыр историез. Мыным но чик ӧз тырмы одӥг нунал куспын Прагалэн чеберлыкез. Но, малпасько, кыкетӥ пол одно ик лыкто на та бусо, лушкес каре...

Сюресчилэн гожтэтъёсыз.

31 коньывуон. Ми мынӥськом Чехие. Ура! Шоркараз - Прагае. Мон туж шумпотӥсько, туж чебер карез адӟо шуыса. Но, ваньмыз вӧйын зырам кадь уг ортчы :) Кызьы приключениостэк! Будапештысь потыса, ог час котыр ортчыса, автобусмы дугдӥз. "Мар луиз, малы сылӥськом?" - юало ваньзы. Асьмелэн автобусмы машинаез пичияк донгем. И всё! Табере полициятэк уж уз сэрттӥськы ни. Но полиция вуэм бере, вань пассажиръёс потӥзы кыре. Табере ваньзылэсь пасспортъёссэс люкаса даннойёсты гожъяло. Мда... асме "Форсаж" киноын кадь шӧдӥсько, кудӥз ке ӵапак автобусын телевизортӥ мынэ вал. Ну, мар со, бӧрдыны уг яра та пумысен - улонын марзэ но уд адӟы.
Я, бен, ужпум йылпумъяськиз,  пыримы берен автобусэ, пуксимы интыосамы...Ноку но ӧй малпа вал, палинкаез - венгер водкаез, татын, Чехие мынӥсь автобусын шӧмъяло шуыса. Но со озьы пӧрмиз :) Кык небӟем венгер пиос пӧлысь одӥгез куноятыса палинкаен ветлӥз автобус кузя. "Мынам дедуше выре вино лэсьтон уж бордын" - шуиз со. Ну, мон веръяй винолэсь лэсьтэм палинкаез. Туж ик курыт ӧз поты: небыт, но шунтӥсь. "Тау" шуи пияшлы. Нош Прагае сюресмы азьланьтӥське (каллен).